பள்ளி மாணவியை பிரம்பால் தாக்கிய ஆசிரியை பணிநீக்கம்: மாவட்டக் கல்வி அலுவலர் அதிரடி

பழனி அருகே நெய்க்காரபட்டி பி.ஆர்.ஜி. நகரிலுள்ள மேல்நிலைப் பள்ளியில் மாணவியை பிரம்பால் தாக்கிய ஆசிரியையை பணி நீக்கம் செய்ய, மாவட்டக் கல்வி அலுவலர் உத்தரவிட்டார்.

   பழனி நெய்க்காரப்பட்டியில் அரசு உதவிபெறும் மேல்நிலைப் பள்ளியில் 6 ஆம் வகுப்பு பயிலும் பழைய ஆயக்குடியைச் சேர்ந்த கணபதி என்பவர் மகள் பாரத மாதா(11). இந்த மாணவி பள்ளி பேருந்தில் ஏறும்போது, உடற்கல்வி ஆசிரியை காளீஸ்வரி பிரம்பால் அடித்ததில், மாணவிக்கு தொடை, தலை ஆகிய இடங்களில் காயம் ஏற்பட்டது. ஆயக்குடி அரசு மருத்துவமனையில் மாணவி சிகிச்சை பெற்றுள்ளார்.

  மாணவி தாக்கப்பட்டது தொடர்பாக அவரது பெற்றோர், பழனி மாவட்டக் கல்வி அலுவலர் கலையரசியிடம் புதன்கிழமை புகார் தெரிவித்தனர். மேலும், புகாரின் மீது நடவடிக்கை எடுக்காவிடில், குழந்தையுடன் வட்டாட்சியர் அலுவலகம் முன்பாக சாகும்வரை உண்ணாவிரதம் இருக்கப் போவதாக தமிழக முதல்வர், மாவட்ட ஆட்சியர் உள்ளிட்டோருக்கு பெற்றோர் தரப்பில் கடிதம் அனுப்பப்பட்டது.

  இதைத் தொடர்ந்து, புகாரை எழுத்து மூலமாக பெற்ற மாவட்டக் கல்வி அலுவலர் கலையரசி, வியாழக்கிழமை பள்ளிக்கு நேரடியாகச் சென்று விசாரணை மேற்கொண்டார். அப்போது, மாணவி தானாகக் கீழே விழுந்ததில் தலையில், காலில் அடிபட்டது என்று பள்ளி நிர்வாகத்தினர் தெரிவித்துள்ளனர்.

  இது குறித்து, பள்ளி நிர்வாகத்தினர் மாணவர்கள் இருவரை அழைத்து வந்து விசாரித்துக் கொள்ளும்படி தெரிவித்தனர். அதன்படி விசாரணையில், மாணவியை ஆசிரியை தாக்கியது உறுதி செய்யப்பட்டது.

  இதையடுத்து, மாவட்டக் கல்வி அலுவலர் கலையரசி, சம்பந்தப்பட்ட உடற்கல்வி ஆசிரியையை பணிநீக்கம் செய்ய உத்தரவிட்டார்.

தொடர்ந்து, பள்ளி நிர்வாகமும் அந்த ஆசிரியையை பணிநீக்கம் செய்து உடனடியாக உத்தரவிட்டது.

இதை இப்படியும் பயன்படுத்தலாம்

பொதுவாக நாம் ஒவ்வொரு பயன்பாட்டுக்கும் ஒவ்வொரு விதமான பொருட்களைப் பயன்படுத்துகிறோம். குறிப்பாக சோப்பு என்றால், குளிக்க ஒரு சோப்பு, சமையல் செய்த பாத்திரங்களை தேய்க்க ஒரு சோப்பு, துணிகளுக்கு ஒரு சோப்பு என மூன்று வகைகள் உள்ளன.

அதுபோல வீட்டில் ஒவ்வொரு உபயோகத்துக்கும் என இருக்கும் பொருட்களில், ஏதேனும் ஒன்று தீர்ந்து போனால், உடனடியாக வேறு ஒன்றை வாங்கி வைக்கிறோம்.

ஆனால், சில அசாதாரண சூழலில் புதிய பொருளை வாங்க முடியாமல் போகும் போது, அதற்கு மாற்றாக சில பொருட்களைப் பயன்படுத்தலாம். அவை என்னென்ன என்று பார்க்கலாம்.

திடீரென காலையில் வீட்டில் டூத் பேஸ்ட் இல்லாமல் போகலாம். உடனே கடைக்குப் போக முடியாமல் இருந்தால், அதற்கு மாற்றாக, பேக்கிங் சோடா பவுடரை தண்ணீரில் குழைத்து பேஸ்டாகப் பயன்படுத்தலாம். இதைக் கொண்டு பற்களை சுத்தம் செய்தால் பற்கள் பளிச்சிடும்.

இதேப்போல, இந்த பேக்கிங் சோடா பவுடரைப் பல்வேறு வகைகளில் பயன்படுத்தலாம்.

மழைக்காலங்களில் கார்பெட்டுகளில் இருந்து வரும் துர்நாற்றத்தைப் போக்க பேக்கிங் பவுடரை தண்ணீரில் கலந்து தெளிக்கலாம்.

கழிவறைகளில் இருந்த வரும் துர்நாற்றத்தை உடனடியாகப் போக்க வேண்டும் எனில், பேக்கிங் பவுடர் கலந்த தண்ணீரைக் கொண்டு கழிவறைகளைக் கழுவி விடலாம்.

இது மட்டும் அல்லாமல், வீட்டில் உள்ள பாத்திரங்கள் பளபளக்க வேண்டும் என்றால், பேக்கிங் பவுடரைக் கொண்டு பாத்திரங்களைத் தேய்த்தெடுக்கலாம்.

அழுக்கடைந்த நகைகளை சுத்தம் செய்யும் போது, பேக்கிங் சோடாவுடன் சில சொட்டு எலுமிச்சை சாறை சேர்த்து, அதனை டூத் பிரஷ்ஷில் எடுத்து சுத்தம் செய்தால் நகைகள் பளிச்சென்று ஆகும். இதனை தங்க நகைகளுக்கும் பயன்படுத்தலாம்.

இதில்லாமல், புதிதாக இறைச்சி உணவுகளை சமைக்கத் துவங்கும் நபர்களுக்கு அதில் இருந்து வரும் நாற்றம் பிடிக்காமல் இருக்கலாம். எனவே, இறைச்சியை சமைக்கும் முன்பு, அதனை சில நிமிடங்கள் பேக்கிங் சோடா கலந்த தண்ணீரில் முக்கி வைத்து சமைக்கலாம். இதனால் நாற்றம் கட்டுப்படும். உணவு பொருள் எந்த வகையிலும் பாதிக்காது.

அழகான பீங்கான் அல்லது பிளாஸ்டிக் உபயோகப் பொருட்களில் ஏதேனும் கரை படிந்தால், அதன் மீது பேக்கிங் பவுடரை தண்ணீரில் குழைத்து பேஸ்ட்டாக்கி பூசி சில நிமிடங்கள் விட்டு பிறகு தேய்த்து கழுவினால் கரை போய்விடு

TET ஆசிரியர் தகுதித்தேர்வில் தேர்ச்சி பெற என்ன செய்ய வேண்டும்?

இந்த மாதம் வருகிறது... அடுத்த மாதம் வருகிறது... நாளை வருகிறது என்று சொல்லிக் கொண்டு இருந்த ஆசிரியர் தகுதித்தேர்வு நமக்கு மிக அருகில் வந்து அமர்ந்துவிட்டது. அதாவது ஆகஸ்ட் 17,18 தேதிகளில். இந்த நேரத்தில் நாம் என்ன செய்யலாம்? இதோ சிந்தனைக்கு சில...

*  பயிற்சி நிலையங்களில் மீது வைக்கின்ற நம்பிக்கையை முதலில் உங்கள் மீது வைக்க வேண்டும்.

*  மனம் மற்றும் உடல் இரண்டையும் தேர்வுக்குத் தயாராக்க வேண்டும்.

*  சுய சிந்தனையுடையவராய் உங்களை நீங்கள் நினைக்க வேண்டும்.

*  தேர்வுக்குத் தயார் செய்வதற்கு செலவிடும் காலத்தையும், வருவாய் இழப்பையும் வாழ்நாள் முதலீடாக கருத வேண்டும்.

*  தகுதித் தேர்வை வெறுக்காமல் வாழ்க்கையில் கிடைக்க பெற்ற வரப்பிரசாதமாகவும், உங்களின் திறமைக்கு விடப்பட்ட சவாலாகவும் ஏற்றுக்கொள்ள வேண்டும்.

*  தகுதித் தேர்வினை ஆதரிக்காவிட்டாலும் அதை எதிர்க்காத மனநிலையைப் பெற்றிருந்தால் அல்லது இனி பெறப்படுவீர்கள் என்றால் உங்கள் வெற்றி உங்களால் உறுதி செய்யப்படும்.

*  முதலில் சந்தையில் கிடைக்கும் கண்டதை எல்லாம் படிக்காமல் தேவையானதை மட்டும் தேர்வு செய்து படிக்க வேண்டும்.

*  6 முதல் 8 ஆம் வகுப்பு வரை பாடம் நடத்த 9,10,11,12-ம் வகுப்பு பாடங்களை ஏன் படிக்க வேண்டும் என்ற எண்ணத்தை தூக்கி எறிய வேண்டும். அதாவது நம்முடைய வாழ்க்கை முழுவதும் சமூகத்தில் மரியாதையையும், பிற பணிகளில் கிடைக்கும் சலுகைகள் மற்றும் இதர பயன்களையும் அளிக்கப் போகும் இந்த தகுதித் தேர்வின் வெற்றிக்கு 6 முதல் 12-ம் வகுப்பு வரையிலான பாடத்திட்டம் மிகவும் குறைவு என்ற எண்ணம் முதலில் வரவேண்டும்.

*  6 முதல் 12 வகுப்பு வரை அனைத்து பாடங்களையும் வாசிக்க வேண்டும். அதுவே தேர்வின் பயத்தினை போக்கி, அதிக மதிப்பெண்ணை பெற்றுத்தரும்.

*  ஒவ்வொரு பாடத்தையும் வாசித்து விட்டு அதில் 30/30, 60/60 எடுத்துவிடுவேன் என்ற நிலையை அடைந்த பிறகு அடுத்த பாடத்திற்கு செல்வது மிகவும் பயனளிக்கும்.

இவ்வாறு உங்களின் திட்டமிடுதல் இருந்தால் பிற பாடங்களை படிக்க முடியாமல் போனாலும் கூட அதிலிருந்து எப்படியும் 12/30 மதிப்பெண்களை பெற்று விடலாம்.

அதாவது 30+30+12+12+12=96 தகுதி மதிப்பெண்களை பெறுவது மிகவும் எளிது.

*  தொடர்ந்து படிப்பதும் சலிப்பை உண்டுபண்ணும். அதனால், சின்னச் சின்ன இடைவெளிகளில் ஓய்வு எடுத்துக்கொள்ள வேண்டும்.

*  சைக்காலஜிக்கென்று கண்டதையெல்லாம் வாங்கி படிப்பதைவிட பேராசியர்.கி.நாகராஜன் அவர்களால் எழுதப்பட்ட கல்வி உளவியல் புத்தகங்களை வாங்கி படிக்கலாம்.

*  தமிழ், கணிதம் - அறிவியல், சமூக அறிவியல், ஆங்கிலம், உளவியல் என்ற வரிசையில் ஒவ்வொரு பாடமாக படித்து முடித்த பின்னர் அடுத்த பாடத்திற்கு செல்ல வேண்டும் என்பதை நினைவில் நிறுத்தி செயல்படுங்கள்.

*  எந்தவிதத் தடுமாற்றமோ, பயமோ இல்லாமல், மிகவும் இயல்பாகத் தேர்வுகளைச் சந்தியுங்கள்.

*  ஒரு தேர்வு முடிந்ததும் அதைப் பற்றிய கவலைகளை விட்டுவிட்டு, அடுத்த நிலைக்கு தயாராகுங்கள்.

படித்ததை படிப்பவர்களோடு பகிர்ந்து கொண்டால் பலன்கள் பல பெறலாம். வாழ்த்துக்கள்.

சிஎப்எல்-க்கு மாறுவோம்!

மின்இழை பல்புகளுக்கு (குண்டு பல்பு) பதிலாக ஃபுளோரசன்ட் பல்புகளை (சிஎப்எல் பல்புகள்) மாற்ற வேண்டும் என்ற முனைப்பை தமிழ்நாடு பல ஆண்டுகளுக்கு முன்பாகவே தொடங்கிய போதிலும், இன்னும் முழுமையாகச் செய்ய இயலவில்லை.

வழக்கமான மின்இழை பல்புகளுக்குச் செலவாகும் மின்சாரத்தில் மூன்றில் ஒரு பங்கு மின்சாரம் சிஎப்எல் பல்புகளுக்குப் போதும். அதே அளவு வெளிச்சம் கிடைக்கும். இதனால் தமிழகத்தில் வீட்டு இணைப்புகளுக்குத் தேவைப்படும் மின்அளவு மூன்றில் ஒரு பங்காகக் குறைவதுடன், மின் நுகர்வோருக்கு மின்கட்டணமும் பாதியாகக் குறையும்.

2010-இல் இந்திய அரசு அறிவித்த திட்டத்தின் கீழ், கேரள மாநிலத்தில் 100 விழுக்காடு சிஎப்எல் பல்புகள் பொருத்தும் பணி செய்து முடிக்கப்பட்டது. இதனால் கேரள மாநிலத்துக்கு ஆண்டுக்கு 300 மெகாவாட் மின்தேவை குறைந்துள்ளது.

தமிழ்நாடு முழுவதிலும் அனைத்து வீடுகளிலும் (சுமார் 1.6 கோடி வீடுகள்) உள்ள குண்டு பல்புகளை மாற்றிவிட்டு, சிஎப்எல் பல்புகளைப் பொருத்தினால் தமிழ்நாட்டில் ஒரு ஆண்டுக்கு 600 மெகாவாட் மின்சாரம் மிச்சமாகும். தமிழ்நாட்டில் நிலவும் மின்பற்றாக்குறையால் பெரிதும் பாதிக்கப்படுவது ஊரகப் பகுதிகளைச் சேர்ந்த வீட்டு இணைப்பு மின்நுகர்வோர் மட்டுமே. மின்சேமிப்புக்கான முனைப்பில் தமிழ்நாடு மின்உற்பத்தி மற்றும் பகிர்மானக் கழகம் சில மாதங்களுக்கு முன்பு இத்திட்டத்தை மீண்டும் அறிவித்தது. இதன்படி ஒருவிளக்கு திட்டத்தில் இடம்பெறும் 11.4 லட்சம் குடிசை வீடுகளுக்கு 9 வாட் சிஎப்எல் பல்புகளை இலவசமாகவும், தமிழகத்தின் இரண்டு மாவட்டங்களில் (விழுப்புரம், கன்னியாகுமரி) மின்நுகர்வோருக்கு 13 வாட் சிஎப்எல் பல்புகளை ரூ.15-க்கு வழங்கவும் தமிழ்நாடு மின் உற்பத்தி மற்றும் பகிர்மானக் கழகம் முடிவு செய்தது.

குடிசைகளுக்கு இலவசமாக வழங்கப்படும் சிஎப்எல் பல்புகளுக்கான செலவாக சுமார் ரூ.14 கோடி வழங்கப்படும். நுகர்வோருக்கான திட்டத்தை (13 வாட் பல்பு ரூ.15) தமிழ்நாடு மின்உற்பத்தி மற்றும் பகிர்மானக் கழகம் ஏற்று அமல்படுத்த வேண்டும்.

2010-ஆம் ஆண்டு இதே திட்டத்தை அறிவித்தபோது, 22 மாவட்டங்களில் உள்ள நுகர்வோருக்கு ஒரு சிஎல்எப் பல்பு ரூ.15-க்கு வழங்கப்படும் என்று தமிழ்நாடு மின்வாரியம் அறிவித்த போதிலும், கடந்த சில மாதங்களுக்கு முன்பு அறிவித்த திட்டத்தில் இரண்டு மாவட்டங்களில் உள்ள 10 லட்சம் வீடுகளுக்கு மட்டுமே ரூ.15 விலையில் பல்பு என்று அறிவித்தது.

தற்போது ராஜஸ்தான் மாநில அரசு அறிவித்துள்ள திட்டத்தின்படி, வறுமைக்கோட்டுக்கு கீழே வாழ்வோரின் இருப்பிடங்களுக்கு மட்டுமின்றி கிராமங்களில் உள்ள அனைத்து மின்நுகர்வோருக்கும் இரண்டு சிஎப்எல் பல்புகள் இலவசமாக வழங்கப்படும். மின்சேமிப்புக்கு மேற்கொள்ளப்படும் இத்திட்டத்துக்கு அரசு ரூ.100 கோடியை ஒதுக்கியுள்ளது. ஒரு கோடி சிஎப்எல் பல்புகள் மூலம் ராஜஸ்தான் மாநிலத்தில் மின்நுகர்வோர் செலுத்தும் கட்டணம் ஆண்டுக்கு ரூ.278 கோடி குறையும், அதாவது மின்நுகர்வோருக்குச் சேமிப்பாகும் என்று ராஜஸ்தான் மின்துறை அமைச்சர் கூறியுள்ளார்.

ராஜஸ்தான் மாநிலம் போல, தமிழகத்திலும் அனைத்து குண்டு பல்புகளையும் சிஎப்எல் பல்புகளாக மாற்றும் முயற்சிகளை விரைவுபடுத்த வேண்டும். இரண்டு மாவட்டங்களை மட்டும் தேர்வு செய்வது போதாது. அனைத்து மாவட்டங்களிலும் இத்திட்டத்தை அமல்படுத்த வேண்டியது அவசியம்.

ஆண்டுக்கு 600 மெகாவாட் மின்சாரம் மிச்சமாகும் என்றால், இந்த அளவு மின்சார உற்பத்திக்குத் தேவைப்படும் நிலக்கரி பயன்பாடும் குறைகின்றது என்று பொருள். இந்திய அளவில் இதனை நடைமுறைப்படுத்தும்போது, நிலக்கரியின் தேவை பல மடங்கு குறையும்.

தமிழக அரசு அலுவலகங்களில் மின்இழை பல்புகள் (குண்டு பல்புகள்) பயன்படுத்தப்படக்கூடாது என்று ஏற்கெனவே தமிழக அரசு ஆணை வெளியிட்டுள்ளது. இந்த அரசாணை ஊரகப் பகுதிகளில் முழுமையாகக் கடைப்பிடிக்கப்படவில்லை. அதை நடைமுறைப்படுத்துவதில் மாவட்ட ஆட்சியாளர்கள் முனைப்பு காட்ட வேண்டியது அவசியம்.

சிஎப்எல் விளக்குகளின் பயன்பாட்டை தமிழக அரசு கட்டாயப்படுத்த வேண்டும். தமிழகத்தில் குண்டு பல்புகள் விற்பனைக்குக் கட்டுப்பாடு விதிப்பதும்கூட சிஎப்எல் பல்புகள் மாற்றத்துக்கு உதவும். ஒவ்வொரு வீட்டுக்கும் மலிவு விலையில் சிஎப்எல் பல்புகளை விற்பனை செய்ய தமிழக அரசு நிதிஒதுக்குவது, தமிழக மின்தட்டுப்பாட்டை சமாளிக்க உதவும்.

சிஎப்எல் பல்புகள் புறஊதாக் கதிர்களை அதிகம் வெளிப்படுத்துவதால் மனிதர்களின் தோலுக்கு நல்லதல்ல என்று ஆய்வுகள் கூறியபோதிலும், இரண்டு அடிக்கு அதிகமான தொலைவில் சிஎப்எல் விளக்குகள் இருந்தால் இத்தகைய புறஊதாக் கதிர்களின் பாதிப்பு ஏற்படாது என்பதையும் ஆராய்ச்சிகள் தெரிவிக்கின்றன. இந்த பல்புகள் உடையும்போது அவற்றை எவ்வாறு கையாளுவது என்பது குறித்த விழிப்புணர்வை மட்டும் மக்களிடம் ஏற்படுத்தினால் போதும்.

தமிழகத்தைப் பொருத்தவரை மின் உற்பத்தியை அதிகரிப்பதில் எந்த அளவுக்கு முனைப்புக் காட்டுகிறோமோ அதே அளவுக்கு மின் சிக்கனத்திலும் மின் இழப்பைக் கணிசமாகக் குறைப்பதிலும் முனைப்பு காட்ட வேண்டியது அவசியம். நாளுக்கு நாள் அதிகரித்து வரும் நிலக்கரி விலையால் அனல் மின் உற்பத்தி மின்சாரத்தின் விலையைக் கணிசமாக உயர்த்தும் நிலையில் இதுபோன்ற முயற்சிகளுக்கு மக்களை ஊக்குவிப்பது அவசியம்.

மாற்றித்தான் பார்ப்போமே...

பள்ளி வேலைநேரத்தில் மாற்றம் இல்லை; பாடவேளையில் மட்டுமே மாற்றம்'' என்று தமிழக அரசு தெளிவுபடுத்திவிட்டது. பாடவேளையை 40 நிமிடங்களாகக் குறைத்திருப்பதும் வழிபாட்டுக்குப் பிறகு தியானம், மதிய உணவுக்கு முன்பாக யோகாசனப் பயிற்சி மற்றும் நீதிபோதனை வகுப்புகள் என எல்லாத் திட்டங்களும் பாராட்டத் தக்கதாக இருந்தாலும், பள்ளி வேலை நேரத்தை ஏன் மாற்றியமைத்திருக்கக்கூடாது என்ற கேள்வி தொக்கி நிற்கிறது. தமிழகத்தில் தொடர்ந்து அன்றாடம் ஒரு பள்ளி வாகன விபத்து நேரிட்டுக்கொண்டிருப்பதைப் பார்க்கும்போது அந்தக்கேள்வி தவிர்க்க முடியாததாகிறது.

பள்ளி வாகனத்தின் ஓட்டை வழியாக விழுந்த நர்சரி பள்ளி குழந்தை இறந்தபோது, அனைத்து பள்ளி வாகனங்களின் மீதான கண்காணிப்பும் நிபந்தனைகளும் கடுமையாக்கப்பட்டன. போக்குவரத்து அலுவலர்களின் ஆய்வுகள் தொடர்ந்தன. இப்போதும் தொடர்கின்றன. ஆனாலும் விபத்துகளின் எண்ணிக்கை குறையவில்லை.

இதற்குக் காரணம், எதிரே வரும் வாகன ஓட்டிகள் தவறிழைக்கிறார்கள். அல்லது பள்ளி வாகனம் அல்லாத மற்ற வாடகை வாகனங்களைப் பெற்றோர் நியமித்துக்கொள்கிறார்கள். பள்ளி வாகனங்களுக்குக் கட்டுப்பாடு, சோதனை இருக்கும் அதே வேளையில், ஆட்டோவோ கால்-டாக்ஸியோ எந்தவிதக் கட்டுப்பாடும் சோதனையும் இல்லாமல் மாணவ, மாணவியரைப் பள்ளிக்குக் கொண்டு செல்கின்றன.

பள்ளி வாகன விபத்துகளுக்கு அடிப்படையான காரணம், பள்ளிகள் மாணவ, மாணவியரின் வசிப்பிடத்திலிருந்து பல கிலோமீட்டர் தொலைவுக்கு அப்பால் இருப்பதுதான். அதனால், மாணவர்கள் பள்ளி வாகனம், சொந்த அல்லது வாடகை வாகனங்களில் பள்ளிக்குச் செல்ல வேண்டிய கட்டாயம் ஏற்படுகிறது.

அரசுப் பள்ளிகள் நகரங்களின் மையப்பகுதியில் சொந்தக் கட்டடத்தில் செயல்படுகின்றன. தனியார் பள்ளிகள் பெரும்பாலானவை, புதியவை என்றால் நிச்சயமாக, புறநகர்ப்பகுதிகளில்தான் அமைந்துள்ளன. சில பள்ளிகள் குறைந்த விலைக்கு இடங்கள் கிடைப்பதால் பல மைல் தொலைவில் சுற்றிலும் புல் பூண்டுகூட முளைக்காத வனாந்திரப் பிரதேசங்களில் இயங்குகின்றன. இத்தகைய பள்ளிகளில் தரமான கல்வி கிடைப்பதாக பெற்றோர்கள் நம்புகிறார்கள். அந்த நம்பிக்கை பல தருணங்களில் வீண்போவதில்லை என்பதும் உண்மை. ஆனால் அவர்கள் வசிப்பிடம் நகரின் மையப்பகுதி!

தமிழ்நாட்டின் கிராமப் பகுதிகளில் 5 கிலோ மீட்டர் சுற்றளவுக்கு நிச்சயமாக ஒரு பள்ளி இருக்கவே செய்கிறது. ஆனால் இந்த கிராமப் பள்ளிகளுக்கு ஆசிரியர்களின் வருகை, விடுதிரும்புதல், அப்பகுதிக்கு வந்துசெல்லும் பேருந்தின் நேரத்தைப் பொருத்ததாக இருக்கிறது. கிராமத்துப் பள்ளிகள் பஞ்சாயத்துக் கட்டுப்பாட்டில் இருந்து தமிழக அரசின் கட்டுப்பாட்டுக்கு வந்தபிறகுதான் இந்த நிலைமை. இதனால் கற்பித்தல் பணி பழுதுபட்டுக் கிடப்பதைக் கண்கூடாகப் பார்க்கும் கிராமத்தினர் தங்கள் குழந்தைகளை தொலைவில் உள்ள தனியார் பள்ளியில் சேர்க்கிறார்கள். இது பெற்றோர்களின் விருப்பம் அல்ல, நிர்பந்தம்!

இந்த நிர்பந்தம், "ஆங்கில மோகம்' என்று திசை திருப்பப்படுகிறது. தங்களுக்கு அருகில் இருக்கும் அரசுப் பள்ளிகளில் உள்ள ஆசிரியர்களின் மீதான நம்பிக்கை இழப்புதான் இந்தத் தனியார் பள்ளிகளைத் தேடிச்செல்லும் கட்டாயத்தைப் பலருக்கும் ஏற்படுத்தியிருக்கிறதே தவிர, அது ஆங்கில மோகத்தால் ஏற்பட்டது அல்ல. உண்மையில், ஆங்கில வழியா, தமிழ் வழியா என்பதைக் காட்டிலும், "நன்றாகக் கற்றுத் தருகிறார்களா, இல்லையா?' என்று மட்டுமே பெற்றோர் பார்க்கிறார்கள். தனியார் பள்ளிகளில், ஆங்கில வகுப்புகளின் எண்ணிக்கைக்கு இணையாகத் தமிழ்வழி வகுப்புகளையும் நடத்த வேண்டும் என்ற நிபந்தனையை அரசு விதித்தால், தமிழ்வழிக் கல்விக்குத்தான் போட்டாபோட்டி இருக்கும் என்பது உறுதி.

வசிப்பிடத்தைவிட்டு மிகத் தொலைவில் பள்ளிகள் இருக்கும் இன்றைய சூழலில் பள்ளிகளின் வேலைநேரத்தை மாற்றி அமைப்பது மட்டுமே- மாணவர்கள் பள்ளிசெல்லும் பயணத்தைப் பாதுகாப்பானதாக மாற்றும்.

அரசுப் பள்ளி ஆசிரியர் அமைப்புகள் எதிர்ப்பதால் அரசு இதை செயல்படுத்தத் தயங்குகிறது. ஆனால் தனியார் பள்ளிகள் தங்கள் பள்ளிவேலை நேரத்தை மாற்றி அமைத்துக் கொள்ள அனுமதிப்பதில் அரசுக்கு என்ன தயக்கம்? தொலைதூரத்தில் அமைந்திருப்பதும், வாகனங்களில் குழந்தைகளைப் பெற்றோர்கள் அனுப்ப வேண்டிய நிர்பந்தம் உள்ளதும் தனியார் பள்ளிகள்தானே?

தனியார் பள்ளிகள் தங்கள் வேலை நேரத்தில் இரண்டு மணி நேரம் முன்னதாகத் தொடங்கினால், போக்குவரத்து நெரிசல் குறைவாக இருக்கும் நேரத்தில் மாணவர்களின் பயணம் அமையும். குறிப்பாக சென்னை போன்ற பெருநகரங்களில் இது பலன் அளிப்பதாக இருக்கும்.

தனியார் பள்ளிகளுக்குச் சீருடைக் கட்டுப்பாடு இல்லை. கல்விக் கட்டணத்தில் கட்டுப்பாடு (இருந்தாலும்) இல்லை. பள்ளி மாணவர்களைச் சேர்த்துக்கொள்வதற்கான எல்லைக் கட்டுப்பாடுகளும் இல்லை. இந்நிலையில், பள்ளி நேரத்தில் மட்டும் கட்டுப்பாடு எதற்காக?

குறைந்தபட்சம் ஓராண்டுக்கு சோதனை அடிப்படையில் பள்ளி வேலைநேரத்தை தனியார் பள்ளிகள் மாற்றிக்கொள்ள அனுமதிக்கலாம். பாடவேளையில் மாற்றம் ஏற்படுத்துவதோடு, பள்ளிநேர மாற்றங்களால் விபத்துகள் கணிசமாகக் குறையும்.

பள்ளிக் கல்வித் துறைக்கு இன்னொரு வேண்டுகோள். தனியார் பள்ளிகள் ஆங்கிலவழி வகுப்புகளுக்கு இணையாகத் தமிழ்வழி வகுப்புகள் நடத்துவதையும் கட்டாயமாக்கலாம். செய்து பாருங்கள். மாற்றம் புரியும்.

டாலருக்கு நிகரான ரூபாயின் மாற்று மதிப்பு புதன்கிழமை வரலாறு காணாத வீழ்ச்சியைச் சந்தித்தது. இதனால் ஒரு டாலருக்கு ரூ. 60.72 தர வேண்டிய நிலை ஏற்பட்டது. செவ்வாய்க்கிழமை வர்த்தகம் முடிவில் டாலருக்கு நிகரான ரூபாயின் மாற்றுமதிப்பு ரூ. 59.66 என்ற நிலையில் இருந்தது. புதன்கிழமை மட்டும் 106 காசுகள் சரிந்தது.

புதன்கிழமை காலை வர்த்தகம் தொடங்கியதிலிருந்து டாலரை வாங்கும் போக்கு அதிகரித்தது. இதனால் ஒரு கட்டத்தில் ஒரு டாலருக்கு ரூ. 60.76 தர வேண்டிய நிலை ஏற்பட்டது. வங்கிகளும், எண்ணெய் இறக்குமதி நிறுவனங்களும் பெருமளவில் டாலரை வாங்கியதே வீழ்ச்சிக்கு முக்கியக் காரணமாகும்.

மேலும், பங்குச் சந்தையிலிருந்து அன்னிய முதலீட்டு நிறுவனங்கள் தொடர்ந்து வெளியேறுவதும் வீழ்ச்சி அதிகரிக்கக் காரணமானது. பங்குச் சந்தையில் புதன்கிழமை அன்னிய முதலீட்டு நிறுவனங்கள் ரூ. 550 கோடி மதிப்புக்கு பங்குகளை விற்பனை செய்துள்ளன.

இந்த மாதத்தில் இதுவரை ரூ. 9,000 கோடி அளவுக்கு அன்னிய நிறுவனங்கள் பங்குகளை விற்பனை செய்துள்ளன. ஜூன் 25-ம் தேதி நிலவரப்படி இதுவரை ரூ. 27,850 கோடி மதிப்பிலான பங்குகளை விற்பனை செய்துள்ளதாக ஆர்பிஐ தெரிவித்துள்ளது. ரூபாயின் மாற்று மதிப்பு தொடர்ந்து சரிவதால் இந்தியாவில் முதலீடு செய்துள்ள நிறுவனங்கள் தங்களது முதலீட்டைத் திரும்பப் பெறத் தொடங்கியுள்ளன.

இதனால் கடந்த சில நாள்களாக ரூபாயின் மாற்று மதிப்பு மேலும் சரிவைச் சந்தித்து வருகிறது. அமெரிக்காவில் பொருளாதார தேக்க நிலை மாறி, வளர்ச்சியை நோக்கி பயணிப்பதாக வெளியான தகவலும் டாலரின் மதிப்பு உயர வழிவகுத்துள்ளது.

டாலருக்கு நிகரான ரூபாயின் மாற்று மதிப்பு தொடர்ந்து சரிவைச் சந்தித்து வருவதைத் தடுத்து நிறுத்த ரிசர்வ் வங்கி உரிய நடவடிக்கை எடுக்கும் என சந்தை வல்லுநர்கள் எதிர்பார்க்கின்றனர்.

கடந்த மே மாதத்திலிருந்து இதுவரை டாலருக்கு நிகரான ரூபாயின் மாற்று மதிப்பு 12 சதவீத அளவுக்குச் சரிவைச் சந்தித்துள்ளது.

சரிவைத் தடுக்க ரிசர்வ் வங்கி ஒரு நாளில் சராசரியாக விற்பனை செய்யும் டாலரின் அளவைக் காட்டிலும் கூடுதலாக டாலரை விடுவித்தது. இதனால் ஓரளவு வீழ்ச்சி தணிந்தது. இருப்பினும் இதே நிலை தொடர்ந்தால் ரூ. 62 என்ற நிலைக்கு மதிப்பு சரியக்கூடும் என வல்லுநர்கள் கருத்து தெரிவித்துள்ளனர். ரூபாயின் மதிப்பு சரிவைத் தடுக்க ரிசர்வ் வங்கியும், மத்திய அரசும் உறுதியான நடவடிக்கை எடுக்காவிடில் சரிவைத் தடுக்க முடியாது என்று வல்லுநர்கள் தெரிவித்தனர்.

இதேபோல யூரோவுக்கான மாற்று மதிப்பு ரூ. 78.22 என்ற நிலைக்குச் சரிந்தது. பிரிட்டன் ஸ்டெர்லிங்குக்கு ரூ. 93.21 தர வேண்டியதாயிற்று. ஜப்பானின் 100 யென்னுக்கு ரூ. 62.09 தர வேண்டியிருந்தது.

குட்டிக்கதை: நண்பன்:-------short stories

ஒரு பணக்காரனுக்கு ஏழை நண்பன் ஒருவன் இருந்தான். ஒரு சமயம் பணக்கார நண்பனுக்கு கொஞ்சம் பணத்தட்டுபாடு நிலவியது.


அந்நேரம் அங்கு வந்த ஏழை நண்பன் அவன் எரிச்சலும், கவலையோடும் இருக்கும் தன் நண்பனை பார்த்து “எப்பிடி டா இருக்கே?” என்று வழக்கம் போல கேட்டான்.

“சும்மா இரு, எனக்கு உடனே இருபது லட்சம் ரூபாய் தேவை. உன்னால் முடியுமா?” என்று கோபமாக கேட்டு விட்டு தன் அறைக்குள் சென்றான் .

அவன் பின்னால் சென்ற ஏழை நண்பன் “அரை மணி நேரத்தில் பணம் கிடைத்தால் பரவாயில்லையா?” என்று ஏழை நண்பன் நிதானமாக கேட்டான்.

பணக்கார நண்பனுக்கு ஒரே அதிர்ச்சி.
ஏழை நண்பனை ஏளனமாக பார்த்தான்.
அரைமணி நேரத்தில் பணம் வந்தது.

பணக்கார நண்பனுக்கு ஒன்றும் விளங்கவில்லை.

பணத்தை குடுத்தவாறு ஏழை நண்பன் சொன்னான்.
“நீ எப்போ பார்த்தாலும் அதிகமா பணத்தை தான் சேர்த்தாய் நண்பா..
நல்ல நண்பர்களை சேர்க்க மறந்திட்டாய். நான் அவைகளை சம்பாதித்து
கொண்டேன் டா” என்றான்.

இருவரும் ஆரத்தழுவி கட்டி கொண்டார்கள்.
இந்த உலகத்திலே எதை சேர்ப்பதை பார்க்கிலும் உண்மை பலமும், உயிருள்ள பலமும் கண்டிப்பாக நண்பர்களை சேர்ப்பது தான்..

இடைநிலை ஆசிரியர்களின் ஆரம்ப ஊதிய விகிதத்தை உயர்த்த கோரிக்கை-ஆரம்ப பள்ளி ஆசிரியர் கூட்டணி dinamalar.com

கடலூர்:இடைநிலை ஆசிரியர்களின் ஆரம்ப ஊதிய விகிதத்தை உயர்த்த வேண்டும் என கல்வி அமைச்சரிடம் ஆரம்ப பள்ளி ஆசிரியர் கூட்டணி வலியுறுத்தியுள்ளது.
பள்ளிக்கல்வித் துறை அமைச்சர் வைகை செல்வனிடம் தமிழக ஆரம்பப் பள்ளி ஆசிரியர் கூட்டணி சார்பில் மாநில பொதுச் செயலர் தாஸ் 41 அம்சக் கோரிக்கைகள் அடங்கிய மனுவை வழங்கினார்.அதன் விவரம்:அங்கீகாரம் இல்லாத கல்விப் பள்ளிகள் இயங்கி வந்ததை ரத்து செய்த முதல்வர் ஜெ.,வுக்கு நன்றி.
இடைநிலை ஆசிரியர்களின் ஆரம்ப ஊதிய விகிதம் 5,200 என்பதை 9,300 என நிர்ணயித்து நடைமுறைப்படுத்த வேண்டும்.ஏழு ஆண்டுகளில் தேர்வு நிலை 14 ஆண்டுகளில் சிறப்பு நிலை, 20 ஆண்டுகளில் உயர்சிறப்பு நிலை என ஏற்படுத்திட கேட்டுக் கொள்கிறோம். நடுநிலைப்பள்ளி தலைமை ஆசிரியர் பட்டதாரி ஆசிரியராக பதவி உயர்வில் பத்தாம் வகுப்பு முடித்து ஆசிரியர் பட்டயம் பெற்றவர்கள் பட்டயக்கல்வித் துறையை பிளஸ் 2விற்கு இணையாகக் கருதி பதவி உயர்வு வழங்க வேண்டும்.
அண்மைப் பள்ளிக்கூட திட்டதை அமல்படுத்தி, வேன் வழியில் சென்று படிக்கும் மாணவர்கள் படுகொலை செய்யப்படுவதை தடைப்படுத்த வேண்டும்.
மனுவை பெற்ற அமைச்சர் கோரிக்கைகள் மீது ஆலோசனை செய்து தீர்வு காணப்படும் என தெரிவித்தார்.

அகஇ - 2013-14ஆம் கல்வியாண்டிற்கான தொடக்க மற்றும் உயர் தொடக்க ஆசிரியர்களுக்கான முதல் CRC 06.07.2013 அன்று தொடங்குகிறது, 40% ஆசிரியர்கள் கலந்து கொள்ள உத்தரவு.

தொடக்க மற்றும் உயர் தொடக்க ஆசிரியர்களுக்கான 2013-14ஆம் கல்வியாண்டின் முதல் CRC 06.07.2013 அன்று தொடங்குகிறது. இப்பயிற்சியில் தேர்ந்தெடுக்கப்பட்ட குறுவள மையங்களில் 40% ஆசிரியர்கள் கலந்து கொண்டு பயிற்சி பெற உத்தரவிடப்பட்டுள்ளது. தொடக்க நிலை ஆசிரியர்களுக்கான பயிற்சி Reinforecment Training on CCE in SABL என்ற தலைப்பிலும், உயர் தொடக்க

நிலை ஆசிரியர்களுக்கான பயிற்சி Reinforecment Training on CCE என்ற தலைப்பிலும் நடைபெற உள்ளது.

மாணவர்கள் கரை சேர, ஆற்றில் நீந்தி பாடம் கற்பிக்கும் ஆசிரியர்

ஜூன் 26,2013,06:36 IST

எழுத்தின் அளவு :

Print

Email

பாலக்காடு: தன்னிடம் படிக்கும் குழந்தைகள் தேர்வில் வெற்றி பெற, கேரளாவை சேர்ந்த ஒரு வகுப்பாசிரியர், கரைபுரண்டோடும் ஆற்று தண்ணீருடன் தினமும் போரிட்டு தோற்கடித்தாக வேண்டிய கட்டாயம் ஏற்பட்டுள்ளது.

கேரள மாநிலம் மலப்புரம் மஞ்சேரி யானைக்கயம் பெரும்பலத்தைச் சேர்ந்தவர் அப்துல் மாலிக். இவர் இரும்பழி எனுமிடத்தில் உள்ள பள்ளியில் 1992ல் ஆசிரியராக சேர்ந்தார். வீட்டிலிருந்து மூன்று பஸ்கள் மாறினால்தான் பள்ளியை அடைய முடியும்.

அதுமட்டுமின்றி பஸ் ஏறுவதற்கு வீட்டிலிருந்து இரண்டு கிலோ மீட்டர் தூரம் நடக்கவும் வேண்டும். இந்த ரூட்டில் பஸ் சர்வீஸ் மிக குறைவு. எப்படிதான் வேகமாக மூச்சிரைக்க ஓடி வந்தாலும் பள்ளிக்கு சரியான நேரத்துக்கு அப்துல் மாலிக்கால் வரமுடியவில்லை.

வேலையில் சேர்ந்து முதல் கல்வியாண்டு முடிந்த பிறகுதான் பள்ளிக்கு எளிதில் வர கடலுண்டி ஆற்றை கடந்தால் போதும் என்ற யோசனை பிறந்தது. அன்று முதல் இன்று வரை கடலுண்டி ஆறு, மாலிக்கின் தினசரி போக்குவரத்து வழியாக மாறிவிட்டது.

மாலிக்கின் வீடும் அவர் பணியாற்றும் பள்ளியும் கடலுண்டி ஆற்றின் இருகரைகளில் உள்ளது. இதன் அருகே பாலங்கள் எதுவும் இல்லை. வீட்டிலிருந்து நேராக யானைக்காயம் பெரிம்பலம் ஆற்றின் கரையோரம் வந்து, அணிந்துள்ள ஆடைகள், டிபன் பாக்ஸ், குடை மற்றும் புத்தகங்களை பிளாஸ்டிக் பையில் வைத்து இடுப்பில் துண்டால் இறுக்க கட்டிக் கொள்கிறார்.

இந்த பையையும் செருப்பையும் ஒரு கைய்யால் ஏந்தி, மறுகையால் டயர் டியூபில் நீச்சலடித்து ஆற்றை தாண்டி அக்கரை சென்றடைகிறார். பிறகு ஆடைகளை அணிந்து டியூபை அருகிலுள்ள வீட்டில் வைத்து விட்டு பள்ளிக்கு செல்கிறார். மாலையிலும் இதேபோல் வீடு திரும்புகிறார்.

தற்போதுள்ள கனமழையிலும் மாலிக் இந்த கடின பாதையை வழிதான் பள்ளிக்கு செல்கிறார் என்பது குறிப்பிடத்தக்கது. இதுகுறித்து மாலிக் கூறுகையில், "இதுவரை எந்தவித ஆபத்தும் ஏற்படவில்லை. வெள்ளம் அதிகரித்துள்ளதால் தற்போது ஆற்றின் தரை மட்டத்தை தொடமுடியவில்லை.

நீச்சலடித்து செல்லும்போது ஆற்றின் இடையே உள்ள பாறைகளிலோ, கற்களிலோ நின்று சிறிது நேரம் ஒய்வெடுப்பேன். தற்போது 12 ஆடி உயரத்தில் ஆற்றில் நீர் உள்ளது. கன மழை தொடர்ந்தால் 36 ஆடி உயரத்துக்கு தண்ணீர் பாய்ந்து செல்லும். அப்போதுதூன் ஆற்றைக் கடப்பது சிறிது சிரமமாக இருக்கும்" என கூறுகிறார்.

இலவச புத்தகப்பை - பள்ளிக்கு எடுத்துச்செல்ல மாணவர்கள் தயக்கம்ஜூன் 24,2013,10:54 IST

எழுத்தின் அளவு :

Print

Email

சென்னை: தமிழக அரசு வழங்கும் இலவச புத்தகப் பையை பள்ளிக்கு எடுத்துச் செல்ல, மாணவர்கள் தயக்கம் காட்டுகின்றனர்.

தமிழகத்தில் பள்ளி மாணவர்களுக்கு இலவச சீருடை, நோட்டுப் புத்தகங்கள் உள்ளிட்ட பல உதவிகள் வழங்கப்படுகின்றன. அ.தி.மு.க., ஆட்சி பொறுப்பேற்றதும், பள்ளி மாணவர்களுக்குக் காலணிகள், புத்தகப் பை (பேக்), லேப்-டாப் வழங்கப்படும் என, முதல்வர் ஜெ., அறிவித்தார். பள்ளிகள் துவக்க நாளன்று இலவச சீருடை, காலணிகள், நோட்டு, புத்தகம் மற்றும் பேக் வழங்க முதல்வர் உத்தரவிட்டதால், ஜூன் 10ம் தேதி முதல் மாணவர்களுக்கு வழங்கப்படுகிறது. இதில், 1 முதல் 3ம் வகுப்பு மாணவர்களுக்கு, ஸ்மால் சைஸ், 4 முதல் 7ம் வகுப்பு மாணவர்களுக்கு, மீடியம் சைஸ், 8 முதல் 10ம் வகுப்பு மாணவர்களுக்கு, லார்ஜ் சைஸ், பிளஸ் 1 மற்றும் பிளஸ் 2 மாணவர்களுக்கு, பெரிய, பேக் வழங்கப்படுகிறது.

தயக்கம்

அரசு சார்பில் வழங்கும் இலவச புத்தகப் பையில், தமிழக அரசின் சின்னம், முதல்வர் ஜெ., உருவம் அச்சிடப்பட்டுள்ளது. இதை பெற்றுச் செல்லும் மாணவர்கள், அந்த, பேக்கை பயன்படுத்தாமல், கடைகளில் வாங்கி பயன்படுத்துகின்றனர்.அரசு சின்னம் மற்றும் முதல்வர் ஜெ., உருவம் அச்சிட்டுள்ள புத்தகப் பையை எடுத்துச் சென்றால், இலவச பொருளை பயன்படுத்துவதாகக் கூறுவர் என்ற எண்ணம் மாணவர்களிடம் உள்ளது.

மேலும், இந்த பேக்குகளில், ஒரு ஜிப் மட்டுமே உள்ளது. வெளியில் பேக் வாங்கினால் இரண்டு அல்லது மூன்று ஜிப்கள் இருக்கும். புத்தகங்களை தனித்தனியாக வைத்துக்கொள்ள முடியும். இதனால், இலவச பையை பயன்படுத்த மாணவர்கள் தயக்கம் காட்டி வருகின்றனர். சில மாணவர்கள், இலவச பேக்கில் உள்ள அரசு சின்னம் மற்றும் முதல்வர் ஜெ., உருவத்தை அழித்து விட்டு பயன்படுத்துகின்றனர்.

பள்ளிப் பாட கால அட்டவணையில் மட்டுமே மாற்றம்ஜூன் 24,2013,11:29 IST

எழுத்தின் அளவு :

Print Email

சென்னை: பள்ளி மாணவர்கள், போக்குவரத்து நெரிசலில் சிக்குவதை தவிர்க்கும் விதமாக, பள்ளிகளின் நேரம் மாற்றப்பட்டுள்ளதாக தெரிவிக்கப்பட்ட நிலையில், பள்ளி பாட கால அட்டவணையில் மட்டுமே மாற்றம் செய்யப்பட்டுள்ளதாகவும், இயங்கும் நேரத்தில் மாற்றமில்லை என, பள்ளிக் கல்வித்துறை தெரிவித்துள்ளது.

தமிழகம் முழுவதும், பள்ளிகள் இயக்கப்படும், 9:30 மணிக்கு, அரசு, தனியார் அலுவலகங்களும் செயல்படத் துவங்குகின்றன. பள்ளி வாகனங்களில் செல்லும் மாணவர்களைத் தவிர, அரசு பேருந்துகளில், சொந்த வாகனங்களில் செல்லும் மாணவர்கள், இதனால், மிகுந்த சிரமத்திற்குள்ளாகி வருகின்றனர். சாலைகள் போதுமான அளவு இல்லாத நிலையில், வாகன பெருக்கத்தால், போக்குவரத்து நெரிசல் ஏற்பட்டு, அதில் மாணவர்கள் சிக்கி, உரிய நேரத்தில் பள்ளிக்கு போக முடியாத நிலை ஏற்பட்டு வருகிறது. இதனால், "ஷிப்ட்" அடிப்படையில் பள்ளிகளை இயக்கலாமா? என்ற, ஆலோசனையும் இருந்தது. சில தனியார் பள்ளிகள், இம்முறையை பின்பற்றியும் வருகின்றன.

இதற்கிடையில், கடந்த சில தினங்களுக்கு முன், பஸ் நேரத்திற்கு வராததால், பால் வேனில் சென்ற மாணவர்கள், விபத்தில் சிக்கி உயிரிழந்தனர். இவற்றை கருத்தில் கொண்டு, பள்ளி நேரத்தை மாற்ற, பள்ளிக் கல்வித்துறை முடிவெடுத்திருப்பதாக கூறப்பட்டது. இதன்படி, இன்று முதல், காலை, 9:30 மணிக்கு பதில், 9:00 மணிக்கு பள்ளிகள் துவங்கும் என்றும், மாலை, 4:30 மணிக்கு பதில், 4:15 மணிக்கு முடியும் என்றும், 2013-14ம் கல்வியாண்டிற்கான நாள்காட்டியில் தெரிவிக்கப்பட்டிருந்தது.இது குறித்து, நாளிதழ்களில் செய்தி வெளியானது. இந்நிலையில், "பள்ளி நேரத்தில் மாற்றமில்லை" என, பள்ளிக் கல்வித்துறை இயக்குனர் தெரிவித்துள்ளார்.

இதுகுறித்து, அவர் வெளியிட்டுள்ள செய்திக்குறிப்பு: பள்ளிக் கல்வி மாணவர்களுக்கு, போதிய உடற்பயிற்சி, யோகா பயிற்சிகள் வழங்கப்பட வேண்டும். நீதி போதனை, உடல்நலம், வாழ்க்கை, சுற்றுச்சூழல் கல்விகள், முதல் உதவி மற்றும் தற்காப்பு விதிகள், இன்றைய காலகட்டத்தில், மாணவ, மாணவியருக்கு அவசியம். மேலும், பள்ளி செயல்பாடுகள், மாணவர்களுக்கு முழுமையான கல்வியை அளிக்க வேண்டும் என்ற நோக்கத்துடனும், தமிழக அரசு, கடந்தாண்டு, அரசாணை ஒன்றை வெளியிட்டது. இதில், காலை வழிபாட்டுக் கூட்டம் நடத்தப்பட வேண்டிய முறை, தியானம், எளிய உடற்பயிற்சிகள் மற்றும் யோகா, நீதி போதனை வகுப்புகள் நடத்தப்பட வேண்டும்.மதிய இடைவேளைக்குப் பின், வாய்ப்பாடு சொல்லுதல், தமிழ் மற்றும் ஆங்கிலத்தில் சொல்வதை கேட்டு எழுதுதல் மற்றும் வெள்ளிக்கிழமை, இறுதி வகுப்பில், மாணவர்களின் தனித்திறன் செயல்பாடுகள் போன்றவை நடத்த வேண்டும் என்று குறிப்பிடப்பட்டுள்ளது.

இதனை செயல்படுத்த, பாடவேளை நேரங்களில் மாற்றம் வேண்டும் என, தலைமை ஆசிரியர்கள் கூறியதன் பேரில், அவர்களை கொண்டு ஒரு குழு அமைத்து, பாடவேளைகள் மாற்றி அமைக்கப்பட்டது. இதற்காக மாதிரி பாட கால அட்டவணையும் தயாரிக்கப்பட்டது.இதேபோல், பாடவேளை நேரங்களை, பள்ளி துவங்கும் மற்றும் முடியும் நேரத்திற்கு உட்பட்டு, மாற்றி அமைத்துக் கொள்ள, முதன்மை கல்வி அலுவலர்களுக்கு, அறிவுரைகள் வழங்கப்பட்டுள்ளன.

பாட கால அட்டவணையில் மட்டுமே, மாற்றங்கள் செய்யப்பட்டன. எனவே, பள்ளி நேரங்களில் மாற்றம் என்பது தவறானது. பள்ளிகள் துவங்கும் மற்றும் முடியும் நேரம் ஆகியவற்றில், எவ்வித மாற்றமும் செய்யப்படவில்லை. பள்ளிகள் வழக்கமாக, தற்போது செயல்படும் நேரங்களிலேயே செயல்படும். இவ்வாறு, அதில் கூறப்பட்டுள்ளது. இந்த அறிவிப்பில், பள்ளி துவங்கும், முடியும் நேரம் குறித்து எதுவும் குறிப்பிடப்படவில்லை. இதனால், நாள்காட்டி தகவலும், இந்த அறிவிப்பும் மாணவர்களை குழப்பமடைய செய்யும் வகையில் உள்ளன.

2013-14ஆம் கல்வியாண்டு குறுவள மையம் மற்றும் பணியிடைப் பயிற்சி நாட்கள் விபரம்
இந்த வருடம் ஆசிரியர்களுக்கு மொத்தம் 7 நாட்கள் மட்டுமே பயிற்சி நாட்கள்.
குறுவள மையம் 3 நாட்கள்
(இடைநிலை மற்றும் பட்டதாரிகள்)
1. 06.07.2013
2. 26.10.2013
3. 04.01.2014
பணியிடைப் பயிற்சி 4 நாட்கள் 1. 20.08.2013
2. 04.09.2013
3. 20.11.2013
4. 04.12.2013

பாடம் நடத்த புத்தகம் இல்லை: பள்ளி ஆசிரியர்கள் தவிப்பு

அன்னூர்: பாடம் நடத்த புத்தகங்கள் வழங்கப்படாததால், தொடக்கப்பள்ளி ஆசிரியர்கள் சிரமத்திற்கு உள்ளாகியுள்ளனர்.

தமிழக அரசு, 2011ம் ஆண்டில், பழைய பாடத்திட்டங்களை மாற்றி, சமச்சீர் கல்வி திட்டத்தை அமல்படுத்தியது. அரசு மற்றும் மெட்ரிக் பள்ளிகள் சமச்சீர் பாடத் திட்டத்தை பின்பற்ற வேண்டும் என உத்தரவிட்டது. இதில் முப்பருவ முறை கடந்த ஆண்டு 8ம் வகுப்பு வரையும், இந்த ஆண்டு 9ம் வகுப்புக்கும் செயல்படுத்தப்பட்டது.

பழைய பாடத்திட்டத்தில் மாற்றம் செய்து, அரசு பள்ளி மாணவர்களுக்கு முன்பு இருந்ததை விட கூடுதலான பாடங்களுடனும், மெட்ரிக் மாணவர்களுக்கு ஏற்கனவே இருந்த பாடத்திட்டத்தை விட குறைந்த பாடங்களுடனும் பாடத்திட்டம் அமைந்துள்ளது. இத்துடன் செயல்வழிக்கற்றலும் அட்டைகள் மூலம் கற்பிக்கப்படுகிறது. புதிய பாடத்திட்டம் அறிமுகப்படுத்தி இரண்டு ஆண்டுகள் ஆகி விட்டன. எனினும், புதிய பாடத்திட்ட புத்தகங்கள் ஆசிரியர்களுக்கு வழங்கப்படவில்லை.

ஆசிரியர்கள் கூறியதாவது:

அன்னூர் வட்டாரத்தில் 74 தொடக்கப்பள்ளிகளும், 17 நடுநிலைப்பள்ளிகளும் உள்ளன. 6,000க்கும் மேற்பட்ட மாணவ, மாணவியர் படிக்கின்றனர். அரசு பள்ளி மாணவ, மாணவியர் அனைவருக்கும் பாட புத்தகங்கள் மற்றும் நோட்டுகள் இலவசமாக வழங்கப்பட்டுள்ளது. ஆனால் பாடம் நடத்தும் ஆசிரியர்களுக்கு புத்தகம் வழங்கப்படவில்லை. பள்ளியில் எவ்வளவு மாணவர்கள் உள்ளனரோ, அவர்களுக்கு மட்டும் வந்துள்ளது. இதனால், மாணவர்களிடம் புத்தகத்தை வாங்கி, பாடம் நடத்த வேண்டி உள்ளது.

புதிய பாடத்திட்டம் என்பதால், வீட்டில் படித்து பார்க்கவும், மாணவரிடம் பெற வேண்டி உள்ளது. அரசு பள்ளிகளில் கல்வித்தரம் உயர பாடுபடும் கல்வித்துறை அதிகாரிகள், ஆசிரியர்களுக்கு, அவர்கள் கற்பிக்கும் வகுப்புகளின் பாடபுத்தகங்கள் தலா ஒரு செட் வழங்க வேண்டும். அப்போது தான், கற்பித்தல் எளிதாக இருக்கும். இவ்வாறு ஆசிரியர்கள் தெரிவித்தனர்.

1743 இடை நிலை ஆசிரியர்களை பதிவு மூப்பு அடிப்படையில் நிரப்புவதற்கான வழகில் இன்று இறுதி தீர்ப்பு வழங்கப்படும் என்று எதிர்பார்க்கப் படுகிறது.

அனைத்து ஆசிரியர் சங்கங்களையும் வருகிற 19 மற்றும் 20ம் தேதி அழைத்து பேச தமிழக அரசு முடிவு

தமிழகத்திலுள்ள அனைத்து தொடக்கக்கல்வித்துறையை சார்ந்த ஆசிரியர் சங்கங்களுடன் வருகிற 19ம் தேதியும், பள்ளிக்கல்வித்துறையை சார்ந்த அனைத்து உயர்நிலை,மேல்நிலைப்பள்ளி சங்கங்களுடன் 20ம் தேதியும் கோரிக்கைகள் குறித்து பள்ளிக்கல்வி அமைச்சர், தலைமை செயலாளர்

மற்றும் சம்பந்தப்பட்ட இயக்குனர்கள் பேச்சுவார்த்தை நடத்த முடிவு செய்துள்ளதாக தமிழ்நாடு ஆசிரியர் கூட்டணி பொதுச்செயலாளர் திரு. செ.முத்துசாமி அவர்கள் தெரிவித்துள்ளார். இதையடுத்து ஆசிரியர்களின் முக்கிய கோரிக்கைகள் குறித்து விரைவில் முடிவெட்டப்படும் என்று தகவல்கள் தெரிவிக்கின்றன.

ஆசிரியர் பயிற்சி படிப்புக்கு ஆர்வம் குறைவு


ஈரோடு: ஈரோட்டில் ஆசிரியர் பயிற்சிக்கு விண்ணப்பம் வினியோகிக்கும் பணி துவங்கிய 15 நாளில் 127 விண்ணப்பங்கள் மட்டுமே விற்றுள்ளன.

தமிழகம் முழுவதும் ஒன்பது ஆசிரியர் பயிற்சி பள்ளிகள், 43 அரசு நிதியுதவி பள்ளிகள், 680 சுயநிதியுதவி பள்ளிகள் என மொத்தம், 732 (டி.டி.ஐ.,) ஆசிரியர் பயிற்சி பள்ளிகள் உள்ளன. இப்பள்ளிகள் அனைத்தும் மாநிலம் முழுவதும் உள்ள, 30 மாவட்ட ஆசிரியர் கல்வி மற்றும் பயிற்சி (டயட்) நிறுவனத்தின் கட்டுப்பாட்டில் இயங்கி வருகிறது.

ஆண்டுதோறும், 40 ஆயிரத்து 710 மாணவர்களும், 63 ஆயிரத்து 350 மாணவியருமாக மொத்தம், ஒரு லட்சத்து 4,060 பேர் ஆசிரியர் பயிற்சி படிப்பு முடிந்து வெளியேறுகின்றனர். இப்பயிற்சி பள்ளியில் ப்ளஸ் 2 முடித்த மாணவ, மாணவியருக்கு, ஆசிரியர் பணிக்கு முன் பயிற்சி, பணியிடை பயிற்சி என இருவகையான பயிற்சிகள் கற்றுக்கொடுக்கப்படுகிறது. கடந்த சில ஆண்டுகளாக இப்பயிற்சியின் மீது மாணவர்களுக்கு ஆர்வமின்மை காரணமாக, அட்மிஷன் எண்ணிக்கை வெகுவாக குறைந்தது.

நடப்பு 2013-14 கல்வியாண்டுக்கான ஆசிரியர் பயிற்சி படிப்புகளில் சேருவதற்கு, தமிழகம் முழுவதும் மே., 27 முதல் ஜூன்., 12 (இன்று) வரை விண்ணப்பங்கள் வினியோகம் செய்யப்பட்டு வருகிறது. எஸ்.சி., எஸ்.டி., பிரிவினர் 250 ரூபாயும், இதர பிரிவினர் 500 ரூபாய் ரொக்கமாக செலுத்தி விண்ணப்பங்களை வாங்கிய இடத்திலேயே ஜூன்., 12ம் தேதி மாலை 5 மணிக்குள் சமர்ப்பிக்க வேண்டும், என உத்தரவிடப்பட்டது.

மாணவர்கள் சேர்க்கை ஆன்-லைன் வழியில் நடக்கவுள்ளது. அதன்படி, ஈரோடு மாவட்டத்தில், ஈரோடு சி.இ.ஓ., அலுவலகத்திலும், பெருந்துறை "டயட்" நிறுவனத்திலும் விண்ணப்பங்கள் வினியோகம் செய்யப்படுகிறது. விண்ணப்பம் வினியோகிக்கும் பணி துவங்கி 15 நாட்களாகியும், ஈரோட்டில் வெறும் 127 விண்ணப்பங்கள் மட்டுமே விற்றுள்ளன.

மாவட்ட ஆசிரியர் கல்வி மற்றும் பயிற்சி நிறுவன அதிகாரி ஒருவர் கூறியதாவது: ஆசிரியர் பயிற்சி  படிப்புக்கு ஆர்வம் குறைவால், பெருந்துறையில் 108 விண்ணப்பங்களும், ஈரோட்டில் வெறும் 19 விண்ணப்பங்கள் மட்டுமே விற்றுள்ளன. துவக்க நாளில் இருந்து மொத்தம் 127 விண்ணப்பம் மட்டுமே விற்றுள்ளன, என்றார்