1743 இடை நிலை ஆசிரியர்களை பதிவு மூப்பு அடிப்படையில் நியமனம் செய்வது குறித்த வழக்கு ஜுன் முதல் இரு வாரங்களில் சென்னை உயர் நீதீ மன்ற தலைமை நீதிபதி அவர்களின் முன்னிலையில் விசாரணைக்கு வரும் என எதிர்பார்க்கப் படுகிறது. பொறுத்திருந்திருந்து பார்க்கலாம்.

ஆசிரியர் பயிற்சி: ஆர்வம் காட்டாத மாணவர்கள்

ஆசிரியர் பயிற்சி படிப்பில் சேர, மாணவர்கள் ஆர்வம் காட்டவில்லை. கடந்த, நான்கு நாட்களில், வெறும், 1,500 விண்ணப்பங்கள் மட்டும் விற்பனை ஆகியுள்ளன. இறுதி தேதிக்குள், 5,000 விண்ணப்பங்கள் விற்றால், பெரிய விஷயம் என, துறை வட்டாரங்கள் தெரிவித்தன.

பிளஸ் 2 படிப்பிற்குப் பின், இரு ஆண்டு, ஆசிரியர் பட்டய பயிற்சியை படித்தால், ஆரம்ப பள்ளிகளில், ஆசிரியர்களாக பணியாற்றலாம். தற்போதைய நிலையில், ஆசிரியர் பயிற்சியை படித்து, தேர்ச்சி பெற்றாலும், டி.இ.டி., தேர்வில், தேர்ச்சி பெற வேண்டும்.

அப்படியே தேர்ச்சி பெற்றாலும், பதிவு மூப்பு அடிப்படையில் தான், பணி நியமனம் நடக்கிறது. ஆசிரியர் பயிற்சி படிப்பு தேர்விலேயே, 30 முதல், 40 சதவீத மாணவர்கள் தான், தேர்ச்சி பெறுகின்றனர்.

இந்த நிலையில், டி.இ.டி., தேர்வு, இந்த மாணவர்களுக்கு, சவாலாகவே உள்ளது. இந்த சவாலை எதிர்கொண்டு வெற்றி பெற்றாலும், பதிவு மூப்பு அடிப்படையில், பணி நியமனம் என்பதால், வேலை கிடைக்க, வயது, 50ஐ எட்ட வேண்டும். இதனால், எந்த வகையிலும், இந்த படிப்பு, மாணவர்களுக்கு, உபயோகமாக இல்லை.

இதனால், இந்த படிப்பில் சேர, மாணவர்கள் மத்தியில், ஆர்வம் இல்லை. 10 ஆண்டுகளுக்கு முன் வரை, 2 லட்சத்திற்கும் மேற்பட்ட மாணவர்கள், இந்த பயிற்சியை பெற முட்டி மோதினர்.

அரசு ஒதுக்கீட்டின் கீழ், 20 ஆயிரம் இடங்கள் இருக்கின்றபோதும், கடந்த ஆண்டு, வெறும், 8,000 இடங்களே நிரம்பின. இந்த ஆண்டு, 4,000 முதல், 5,000 இடங்கள் நிரம்பினாலே பெரிய சாதனையாக இருக்கும் என, ஆசிரியர் கல்வி பயிற்சித்துறை வட்டாரங்கள் தெரிவிக்கின்றன.

கடந்த, 27ம் தேதி முதல், விண்ணப்பங்கள் வழங்கப்பட்டு வருகின்றன. கடந்த நான்கு நாட்களில், வெறும், 1,500 விண்ணப்பங்கள் மட்டுமே விற்பனை ஆகியிருப்பதாக, துறை வட்டாரங்கள் தெரிவித்தன.

கடைசி தேதியான, ஜூன், 12 வரை, மேலும், 3,500 விண்ணப்பங்கள் விற்பனை ஆகுமா என்பதும் கேள்விக்குறியாக உள்ளது. இந்த படிப்பு, மாணவர்கள் மத்தியில், போணி ஆகாததால், ஆசிரியர் பயிற்சிப் பள்ளிகள், பி.எட்., கல்லூரிகளாக மாற்றப்பட்டு வருகின்றன.

கடந்த ஆண்டு, 50 பள்ளிகள் மூடப்பட்டன.இந்த ஆண்டும், கலந்தாய்வு துவங்குவதற்குள், 50க்கும் மேற்பட்ட ஆசிரியர் பயிற்சிப் பள்ளிகள் மூடப்படலாம் என, எதிர்பார்க்கப்படுகிறது

ஆகஸ்ட் - 17, 18-ல் ஆசிரியர் தகுதித் தேர்வு

2013ஆம் ஆண்டுக்கான ஆசிரியர் தகுதித் தேர்வை ஆகஸ்ட் மாதம் 17, 18 தேதிகளில் நடத்தப்படும் என்று தமிழ்நாடு ஆசிரியர் தகுதித் தேர்வு வாரியம் இன்று அறிவித்துள்ளது.

ஆசிரியர் தகுதித்தேர்வு மத்திய அரசின் இலவச கட்டாய கல்வி உரிமைச் சட்டத்தின்படி, இடைநிலை ஆசிரியர் மற்றும் பட்டதாரி ஆசிரியர் பணி நியமனங்களுக்கு தகுதித்தேர்வு கட்டாயமாக்கப்பட்டு உள்ளது.

அதன் அடிப்படையில் அரசு பள்ளிகளில் சுமார் 23 ஆயிரம் ஆசிரியர் பணி இடங்களை நிரப்புவதற்காக கடந்த ஆண்டு அக்டோபர் மாதம் தகுதித்தேர்வு நடத்தப்பட்டது. அதில் ஏறத்தாழ 6½ லட்சம் ஆசிரியர்கள் தேர்வு எழுதியதில் 10397 இடைநிலை ஆசிரியர்களும், 8,849 பட்டதாரி ஆசிரியர்களும் தேர்ச்சி பெற்றனர்.

இந்த தகுதித்தேர்வு மூலம், காலியாக இருந்த அனைத்து இடைநிலை ஆசிரியர் பணி இடங்களும் நிரப்பப்பட்ட நிலையில், தகுதியானவர்கள் கிடைக்காததால் சுமார் 10 ஆயிரம் பட்டதாரி ஆசிரியர் பணி இடங்கள் நிரப்பப்படவில்லை.

காலியாக உள்ள ஆசிரியர் பணி இடங்கள் அடுத்த தகுதித்தேர்வு மூலமாக நிரப்பப்படும் என்று அரசு அறிவித்து இருந்தது. எனவே, இந்த ஆண்டுக்கான தகுதித்தேர்வு எப்போது நடத்தப்படும்? என்று இடைநிலை ஆசிரியர்களும், பட்டதாரி ஆசிரியர்களும் ஆவலுடன் எதிர்பார்த்து வந்தனர்.

இந்நிலையில் தகுதித்தேர்வுக்கான அறிவிப்பினை ஆசிரியர் தேர்வு வாரியம் இன்று வெளியிட்டுள்ளது.

ஆசிரியர் தேர்வு வாரியம் இன்று வெளியிட்டு அறிக்கையில் இந்த ஆண்டுக்கான தகுதித்தேர்வு இடைநிலை ஆசிரியர்களுக்கு ஆகஸ்ட் 17ஆம் தேதியும்(முதல் தாள்), பட்டதாரி ஆசிரியர்களுக்கு ஆகஸ்ட் 18ஆம் தேதியும்(இரண்டாம் தாள்) நடத்தப்பட உள்ளது. காலை 10 மணி முதல் மதியம் 1 மணி வரை தேர்வு நடைபெறும்.

தகுதித்தேர்வுக்கு மொத்த மதிப்பெண் 150. தேர்ச்சி பெறுவதற்கான குறைந்தபட்ச மதிப்பெண் 60 சதவீதம் அதாவது 150-க்கு 90 மதிப்பெண்கள் எடுக்க வேண்டும்.

விண்ணப்பம் விநியோகம் வருகின்ற ஜூன் மாதம் 17ஆம் தேதி முதல் தமிழகத்தில் உள்ள அனைத்து அரசு மேல்நிலைப் பள்ளிகளிலும் விநியோகம் செய்யப்பட உள்ளன.

விண்ணப்பத்தின் விலை ரூ.50. தேர்வுக்கட்டணம் ரூ.500. தாழ்த்தப்பட்டோர், பழங்குடியினர் மற்றும் மாற்றுத்திறனாளிகளுக்கு ரூ.250 மட்டும்.

பூர்த்தி செய்யப்பட்ட விண்ணப்பங்களை  சம்பந்தப்பட்ட மாவட்ட கல்வி அதிகாரி (டி.இ.ஓ. ஆபீஸ்) அலுவலகத்தில் 01.07.2013 தேதிக்குள் நேரில் சமர்ப்பிக்க வேண்டும் என்று ஆசிரியர் தேர்வு வாரியம் தெரிவித்துள்ளது.

14 லட்சம் விண்ணப்பங்களை அச்சிட முடிவு:
ஏற்கனவே இரண்டு தடவை நடத்தப்பட்ட தகுதித்தேர்வுகளில் தேர்ச்சி விகிதம் குறைவாக இருந்ததால் அதிலும் குறிப்பாக தாழ்த்தப்பட்சோர் மற்றும் பழங்குடியினத்தவர் மிகக்குறைந்த எண்ணிக்கையில் இருந்ததால் குறைந்தபட்சம் இடஒதுக்கீட்டு பிரிவினருக்காவது சற்று மதிப்பெண் சலுகை வழங்கப்படும் என்று எதிர்பார்க்கப்பட்டது. ஆனால், தேர்ச்சி மதிப்பெண்ணில் எவ்வித மாற்றமும் செய்யப்படவில்லை.

இந்த ஆண்டு ஏறத்தாழ 7 லட்சம் பேர் தகுதித்தேர்வு எழுதுவார்கள் என்று தேர்வு வாரியம் எதிர்பார்க்கிறது. எனவே, சுமார் 14 லட்சம் விண்ணப்ப படிவங்களை அச்சிட முடிவு செய்துள்ளது. கடந்த ஆண்டு மாவட்ட கல்வி அதிகாரி அலுவலகங்களில் மட்டுமே விண்ணப்பங்கள் வழங்கப்பட்டன. இதனால், ஒருசில மாவட்டங்களில் நெரிசல்கள் அதிகமானது. இதை தவிர்க்கும் வகையில், தமிழகத்தின் அனைத்து அரசு மேல்நிலைப் பள்ளிகளிலும் விண்ணப்பங்கள் விநியோகம் செய்ய ஏற்பாடு செய்யப்பட்டுள்ளது.

15 ஆயிரம் காலியிடங்கள்: 
கடந்த ஆண்டுக்கான காலி பணி இடங்கள், இந்த ஆண்டுக்கு அனுமதிக்கப்பட்ட இடங்கள் என மொத்தம் 15 ஆயிரம் ஆசிரியர் பணி இடங்கள் தகுதித்தேர்வு மூலமாக நிரப்பப்பட உள்ளன. இதில் பட்டதாரி ஆசிரியர் பணி இடங்கள் 13 ஆயிரம், இடைநிலை ஆசிரியர் இடங்கள் 2 ஆயிரம். பணிநியமன முறையில் இந்த ஆண்டு புதிய முறை அமல்படுத்தப்படுகிறது.

முதலில் தகுதித்தேர்வு நடத்தப்பட்டு அதில் வெற்றிபெற்றவர்களின் சான்றிதழ் சரிபார்க்கப்படும். அதன்பிறகு தகுதியான நபர்களுக்கு தகுதித்தேர்வில் தேர்ச்சிபெற்றதற்கான சான்றிதழ் வழங்கப்படும். இதைத்தொடர்ந்து, காலி இடங்கள் பற்றிய அறிவிப்பு வெளியிடப்படும். தகுதித்தேர்வில் தேர்ச்சி பெற்ற ஆசிரியர்கள் தங்கள் தகுதித்தேர்வு மதிப்பெண்ணுடன் விண்ணப்பிக்க வேண்டும்.

பட்டதாரி ஆசிரியர்களைப் பொருத்தமட்டில், தகுதித்தேர்வு மதிப்பெண் மற்றும் +2, டிகிரி, பி.எட். மதிப்பெண் அடிப்படையில் மெரிட் பட்டியல் தயார்செய்யப்பட்டு ஆசிரியர் தேர்வு செய்யப்படுவார்கள். இடைநிலை ஆசிரியர்கள் உச்ச நீதிமன்ற தீர்ப்புக்கு உட்பட்டு, மாநில அளவிலான பதிவுமூப்பு அடிப்படையில் தேர்ந்தெடுக்கப்படுவார்கள்.